‏6 اِيشوَرَي هيڪي ماڻسا نُون موڪللَي جڪا چَي نان يوحنا هِلَي۔ ‏7 او اوهچ سوجھري چي باري ۾ شاهِدِي ڏِيُون آلا تہ جُون ويهچ شاهِدِي چي ڪاڻ ڪتِي سِگڙين ماڻسين وشواس آڻس۔ ‏8 يوحنا آپ تہ اُون سوجھرَي ڪونهِي هِلَي پَر او سوجھرَي چي باري ۾ شاهِدِي ڏِيُون آلا هِلا۔ ‏9 اُون سچَي سوجھرَي، جڪو هر ماڻسا پر چمڪَي ڇَي، دُنِيائِي ۾ آوڻي هاڙَي هِلَي۔ ‏10 اُون دُنِيائِي ۾ هِلَي ائُون دُنِيا اوڇي وسِيلي سُون ٺيهلِي پَر دُنِيائِي چي ماڻسين اونهُون ڪونهِي اوڙکلَي۔ ‏11 اُون آپڪان ماڻسان کن آلَي پَر اوڇي آپڪَين اونهُون قبُول ڪونهِي ڪلَي۔ ‏12 پَر جِترين بِي اونهُون قبُول ڪلَي ائُون اوڦر وشواس ميلهلا، اُڻهين اُونهان نُون اِيشوَرا چي ٻاڙين ٺيهڻي چَي حق ڏِلَي۔ ‏13 وي اِيشوَرا چي ٻاڙين جُون ڪونهِي ٺيهلين جُون ماڻسان چي هُوي هِتين ڪان جو وين ماڻسان چِي مرضِي سُون ڪونهِي ٺيهلين پَر اِيشوَرَي آپ اُونهان نُون آپڪين ٻاڙين ٺاهلين۔ ‏14 وچن ماڻس ٺيهلا ائُون آپلي بِچا ۾ ريهلا۔ آپُون او منجھ ٻا چي هيڪي پُوتا سِرکا شانَ ڏيکلا ڪان جو او ڪِرپائِي ائُون سچائِي سُون ڀرجوڙا هِلا۔ ‏15 يوحنائَي اوڇي باري ۾ شاهِدِي ڏِلِي ائُون ڏاڍيُون ڪيهلَي تہ، ”ها اوهچ ئِي ڇَي جڪا چي باري ۾ مين ڪيهلَي هِلَي تہ جڪو مان کن پڇي آوڻي هاڙا ڇَي او مان کن بِي موٽا ڇَي ڪان جو او مان کن بِي پيهڻُون هِلا۔ ‏16 ڪان جو او ڪِرپا ائُون سچائِي سُون ڀروڙا ڇَي ايڇي ڪاڻ ڪتِي آپان سِگڙان نُون ڪِرپائِي پر ڪِرپا مِللِي ڇَي۔ ‏17 ڪان جو پرميشوَرَي آپڪي حُڪم مُوسيٰ چي وسِيلي سُون ڏِلي پَر ڪِرپا ائُون سچائِي يسُوع مسِيحا چي وسِيلي سُون مِللِي۔ ‏18 اِيشوَرا نُون ڪِڻهين بِي ڪِڏ ڪونهِي ڏيکلَي ڇَي پَر اوڇا هيڪَچ پُوت جڪو او ڀيڙا ٻيهلا ڇَي، اُڻهيچ اِيشوَرا نُون ظاهر ڪلَي ڇَي۔“

‏19 يوحنا چِي شاهِدِي ها ڇَي تہ جِڏ يهُودِيئَين يروشلم گانوان کن اِيشوَرا چي پُجارِيان ائُون شيوا ڪرڻي هاڙان نُون يوحنا ڏِسِين اِين پُوڇڻي ڪاڻ موڪللَي تہ، ”تُون ڪُوڻ هِتا؟“ ‏20 تِڏ يوحنائَي ها بات ڪونهِي لُڪولِي پَر سِڌي سِڌي ڪيهلَي تہ، ”مين تہ مسِيح ڪونهِي ڇَين۔“ ‏21 اُونهين بڙتِي پُوڇلَي تہ، ”پڇي تُون ڪُوڻ هِتا؟ ڪا تُون اِيشوَرا چا نِياپا ڏِيڻي هاڙا ايلِياه هِتا؟“ يوحنائَي ڪيهلَي تہ، ”نہ، مين او ڪونهِي ڇَين۔“ اُونهين هيڪ چڪر بڙتِي پُوڇلَي تہ، ”ڪا تُون اِيشوَرا چا اوهچ نِياپا ڏِيڻي هاڙا هِتا جڪا چا امهِين آسرا ڪرُون ڇئُون پلي؟“ يوحنائَي ڪيهلَي تہ، ”نہ۔“ ‏22 پڇي اُونهين پُوڇلَي تہ، ”پڇي امهان نُون سُڻا، تُون ڪُوڻ هِتا؟ ڪان جو امهان نُون اُونهان نُون جواب ڏِيڻا ڇَي جِڻهين امهان نُون موڪللَي ڇَي۔ تُون آپ آپڪي باري ۾ ڪا ڪيهي هِتا؟“ ‏23 تِڏ يوحنائَي اِيشوَرا چا نِياپا ڏِيڻي هاڙي يسعياها چِي وا بات ڪيهلِي تہ،

‏24 جڪان ماڻسان نُون موڪللَي گيلَي هِلَي اُونهان ۾ ڪهِين فريسِي فِرقي هاڙي بِي هِلي۔ ‏25 اُونهين يوحنا کن پُوڇلَي تہ، ”جي تُون نہ ئِي مسِيح هِتا ائُون نہ ئِي تُون ايلِياه هِتا ائُون نہ ئِي اوهچ اِيشوَرا چا نِياپا ڏِيڻي هاڙا هِتا جڪو آوڻي هاڙا ڇَي، تہ پڇي تُون ڪان پوِيتر شنان ڏِيئي هِتا؟“ ‏26 يوحنائَي اُونهان نُون ڪيهلَي تہ، ”مين تہ رُگَي پاڻِيان سُون پوِيتر شنان ڏِيئَين ڇَين پَر تمچي بِچا ۾ هيڪ اِسڙَي ماڻس اُڀلَي ڇَي جڪا نُون تمهِين ڪونهِي اوڙکا ڇوا۔ ‏27 ها اوهچ ڇَي جڪو مان کن پڇي آوڻي هاڙا ڇَي ائُون مين اي لائِق بِي ڪونهِي ڇَين تہ اوڇِي جُوتِي چِي ڪهِي کولَين۔“ ‏28 جي سِگڙِيا باتا يردن دريا چي اوڀرا پاسُون بيت عَنِياه گانوان ۾ هُلِيا جِٺي يوحنا پوِيتر شنان ڏِتا۔

‏29 ڏُوجي ڏِيئو يوحنائَي پرڀُو يسُوعا نُون آپا ڏِسِين آتان ڏيکتِي ڪيهلَي تہ، ”ڏيکا، ها اِيشوَرا چا گھيٽا ڇَي جڪو دُنِيائِي چي ماڻسان چي پاپ چتِي جا ڇَي۔ ‏30 ها اوهچ ڇَي جڪا چي باري ۾ مين ڪيهلَي هِلَي تہ، ’مان کن پڇي هيڪ اِسڙَي ماڻس آوڻي هاڙَي ڇَي جڪو مان کن بڌِيڪ عزتِي هاڙَي ڇَي ڪان جو اُون مان کن پيهڻُون هِلَي۔‘ ‏31 مين تہ ڪونهِي اوڙکتا تہ او مسِيح ڇَي پَر مين ايڇي ڪاڻ پاڻِيان سُون پوِيتر شنان ڏِتا آلا ڇَين تہ جُون اِسرائِيلِي قوم اونهُون اوڙکَي۔“

‏32 پڇي يوحنائَي ها شاهِدِي ڏِلِي تہ، ”مين پوِيتر آتمائِي نُون ڪبُوترا هاڙِي ڪار آسمانا مُون اُترتان ائُون اوڦر ٻيستان ڏيکلَي ڇَي۔ ‏33 مين تہ اونهُون ڪونهِي اوڙکتا پَر جِڻهين منُون پاڻِيان سُون پوِيتر شنان ڏِيڻي ڪاڻ موڪللَي ڇَي اُڻهيچ منُون سُڻالَي تہ، ’جڪا پر تُون پوِيتر آتمائِي نُون اُترتان ائُون ٻيستان ڏيکي، اوهچ ئِي پوِيتر آتمائِي سُون پوِيتر شنان ڏِيڻي هاڙا هُوِي۔‘ ‏34 اِمهين مين ڏيکتِي ڇوڙلَي ڇَي ائُون شاهِدِي ڏِيئَين ڇَين تہ هچ ئِي اِيشوَرا چا پُوت ڇَي۔“

‏35 ڏُوجي ڏِيئو يوحنا بڙي ويهچ جائِي پر آپڪان چيلان مُون ڏُونه چيلان ڀيڙا اُڀلا هِلا۔ ‏36 جِڏ اُڻهين پرڀُو يسُوعا نُون اُٺُونچ لنگھتان ڏيکلَي تِڏ ڪيهلَي تہ، ”ڏيکا، ها اِيشوَرا چا گھيٽا ڇَي۔“ ‏37 جِڏ اُونهين ڏُونه چيلين يوحنا نُون اِين ڪيهتان سُڻلَي تہ وي پرڀُو يسُوعا چي لارُون چالُون لاگلي۔ ‏38 پرڀُو يسُوعَي پُوٺَي ڦِرتِي اُونهان نُون لارُون آتان ڏيکلَي ائُون اُونهان کن پُوڇلَي تہ، ”تمهِين ڪا سوڌا ڇوا پلي؟“ اُونهَين ڪيهلَي تہ، ”ربِي، تُون ڪِٺي ريهي هِتا؟“ ربِيئا چا مطلب ڇَي ”گرُو“۔ ‏39 پرڀُو يسُوعَي ڪيهلَي تہ، ”آوا، آپ ڏيکتِي گيهوا۔“ او اٽڪل آنٿڻا چي چاران بجان چا وقت هِلا جِڏ وي او ڀيڙي گيلي ائُون وا جاءِ ڏيکلِي جِٺي پرڀُو يسُوع ريهتا۔ وي اوهچ ڏِيها چا بچوڙا وقت او ڀيڙي ريهلي۔ ‏40 جي ڏونهِين جڪو يوحنا چِي بات سُڻتِي پرڀُو يسُوعا چي لارُون گيلي هِلي، اُونهان ۾ هيڪ اندرياس هِلا جڪو شمعُون پطرسا چا ڀائُو هِلا۔ ‏41 اندرياس سِگڙان کن پيهڻُون آپڪي ڀاوا شمعُونا سُون گڏجلا ائُون اونهُون سُڻالَي تہ، ”امهان نُون اِيشوَرا چا چُونڊوڙا مسِيح مِلتِي گيلا ڇَي۔“ ‏42 پڇي او شمعُونا نُون بِي پرڀُو يسُوعا کن گيهتِي آلا۔ پرڀُو يسُوعَي اونهُون ڏيکتِي ڪيهلَي تہ، ”تُون يوحنا چا پُوت شمعُون هِتا، آجا کن ڪتِي تُڌَي نان ڪيفا هُوِي۔“ ارامِي ٻولِي ۾ ڪيفا چا مطلب ڇَي تہ ”پطرس“ مطلب تہ ”پٿر“۔

‏43 ڏُوجي ڏِيئو پرڀُو يسُوعَي گلِيل صُوبي ڏِسِين جاڻي چا اِرادا ڪلا۔ او اُٺِيچ جتِي فِلِپُسا سُون مِللا ائُون اونهُون ڪيهلَي تہ، ”مانڇا چيلا ٺيهتِي مانڇي لارُون چال۔“ ‏44 فِلِپُس بيت صيدا گانوان چا ريهڻي هاڙا هِلا، جِٺي اندرياس ائُون پطرس بِي ريهتي۔ ‏45 پڇي فِلِپُس نتن ايلا سُون مِللا ائُون اونهُون سُڻالَي تہ، ”او امهان نُون مِلتِي گيلا ڇَي، جڪا چي باري ۾ مُوسيٰ حُڪمان چي ڌرمِي ڪِتابا ۾ سُڻالَي ڇَي ائُون اِيشوَرا چا نِياپا ڏِيڻي هاڙين لِکلَي ڇَي۔ او يُوسفا چا پُوت يسُوع ڇَي جڪو ناصرت گانوان چا ريهڻي هاڙا ڇَي۔“ ‏46 تِڏ نتن ايلَي اونهُون ڪيهلَي تہ، ”جُون ڪِيُون هُو سِگھَي ڇَي تہ ناصرت گانوان مُون ڪو سُٺِي شئي نِڪرَي۔“ فِلِپُسَي ڪيهلَي تہ، ”تُون آپ چالتِي ڏيک۔“

‏47 جِڏ پرڀُو يسُوعَي نتن ايلا نُون آتان ڏيکلَي تِڏ اوڇي باري ۾ ڪيهلَي تہ، ”ها اصل اِسرائِيلِي ڇَي ڪان جو ايڇِي دِلِي ۾ ٺڳِي ڪونهِي۔“ ‏48 تِڏ نتن ايلَي پرڀُو يسُوعا کن پُوڇلَي تہ، ”تُون منُون ڪِيُون اوڙکي هِتا؟“ پرڀُو يسُوعَي اونهُون ڪيهلَي تہ، ”جِڏ فِلِپُسَي تنُون ساڏ ڪلا، او کن پيهڻُون مين تنُون انجِيرا چي بڻا جھِڪُون ڏيکلَي هِلَي۔“ ‏49 تِڏ نتن ايلَي ڪيهلَي تہ، ”گرُو، تُون اِيشوَرا چا پُوت هِتا ائُون اِسرائِيلِي قومِي چا بادشاه هِتا۔“ ‏50 پرڀُو يسُوعَي اونهُون ڪيهلَي تہ، ”ڪا تين ايڇي ڪاڻ وشواس آڻلا تہ مين تنُون سُڻالَي تہ مين تنُون انجِيرا چي بڻا جھِڪُون ڏيکلَي هِلَي؟ تُون اي کن بِي موٽي موٽي ڪام ڏيکي۔“ ‏51 پڇي اونهُون اِين بِي ڪيهلَي تہ، ”مين تنُون سچ سچ ڪيهين ڇَين تہ تمهِين آسمانا نُون کُلوڙَي ائُون اِيشوَرا چي ملائِکان نُون مٿي جتان ائُون ماڻسا چي پُوتا پر اُترتان ڏيکا۔“